Pwerteng Bisaya-a

Mingsawop na ang adlaw. Mingitngit sa among dapit. Gisug-an na ang lamparilya, ibabaw sa lamesa. Gabi-i na pud. Naa na pud 'ta ani. Sugod na'g tikang sa katre. Higda. Hayang. Kuha sa unlan. Pamalandong. Gahuna-huna sa mga nangagi. Makapanghupaw. Maayo pa ang unlan -  tig-sawo sa mga luha, tig-tukod sa naglabad nga ulo, tig-hupay sa kahidlaw sa gakos, tig,... maayo pa ang unlan.

'Bihar' is someone, something Grabe siguro 'ning pitik sa kasing-kasing. Tuod, nagkasinabot silang duha. Nadungog nila ang usag-usa. Gibisita ka. Mipahuway sa nahabiling lugar sa kama. Gikapoy. Nakatulog. Ug wala damha, nga mao na diay kadto ang kinalasan natong panagkita. Maayo pa og wala nalang. Wala hibaw-i  kung kanus-a napud  ang higayon ang mga palad magdikit, tultulon ang kinahiladman sa imong tinaguan. Ang mga ngabil manguros, sa imong nawong, tultulon ang simod ug ikompesal sa imong  dila kining pagbati. Maayo pa lagi'g wala nalang. Ahak.

Kaniadto, sa bata pa ako hadlok ko nga modako kay mabalaka ko nga wala nakoy kaduwa, mabalaka ko nga mosakay og jeep, mabalaka ko nga modesisyon, maghuna-huna ko sa dagkong problema, maghuna-huna ko sa akong pagskwela, maghuna-huna ko sa akong kan-onon, magbayad ko sa mgabayrunon, magbayad ko sa mga oras, magbayad ko sa akong kusog. mabalaka. maghuna-huna. magbayad. Apan, karong dako nako, ang kining tanang gibuhat nako, hadlok tuod siya, kung ako ra usa.

Nakapangutana ka sa imong kaugalingon kung hangtod kanus-a nalang  ka mabuhi 'ning kalibutana ? Nakapangutana ko .

Nagdaguob ang tiyan, Naglabad ang ulo, Nagsakit ang kaonuran. Unsa pa'y mas lami aning silot sa kagahapon?

Nasayop. Pasaylo. Wala na ba'y laing pa-agi? Wala na gyud. Giandam ang kaugalingon. Duha ka buwan, igo na siguro ni. Nipahawa. Wala'y kisaw; wala'y pahibawo. Pagmahay. Paghuna-huna sa malipay nga kagahapon. Pagkatawa. Paghilak. Katawa na pud. Taod-taod, sunod sunod ang pag tulo sa luha. Asa na punita ang nangadugmok nga paglaom? Sakit pamalandungon. Ang silot sa kagahapon.

Pagmahay. Wala ra man siguro. Ako bitaw 'ning gisudlan. Hala, padayon. Humana na. Basin makaya pa diay. Kaguol. Sus, naa na pud 'ta ani. Wala ra man siguro. Itulon ra na, kuyog sa galapot nga laway. Dili ba, malibang ra nimo 'na. Kining tanan, maoy ra. Wala'y kuyaw, Wala'y hugyaw. Puro litiral, ra.

Tan-aw ko, usa ako ka haligi nga galakaw-lakaw. Bisan kinsa akong nahimamat, Bisan kinsa akong nakastorya. Sa matag higayon nga kita nagkailahay, sama ra nga ikaw nagtusok og bag-ong tamtacks ug nahimong parte niining haligi. Kahibalo ka, Ingon ana kapilit ang haligi  sa mga gipangtusok niini. Apan, Palihug, ayaw lang ninyo tang-tanga kay sigurado, magdagayday ang dugo dili tungod abli na ang samad niini Kung dili kuyog niana ang kasakit nga mibuhi mo sa akong kinabuhi. Ug kung gani,  inyo nang nahinay-hinay ug tang-tang ang inyong gipangtusok, mamalihug unta ko, okay ra? Ilabay nalang kining haligi ug iuban sa pagsunog kay sama lang naman kini sa wala na'y kinabuhi. Ug daghang salamat, diay sa tanang handumanan nga atong nabuhat

Unsa'y tawag nimo anang ikaw ra ang kahibalo nga naibog ka sa imong higala? Unsa'y tawag nimo anang tawo nga nabuang ug nabogo sa usa niya ka higala? Unsa'y tawag nimo anang ikaw andam mo sakripisyo para kaniya? Unsa'y tawag nimo sa imong kaugalingon nga nagpakatangâ alang kaniya nga dili gyud ma-imuha? Unsa'y tawag nimo sa imong kaugalingon nga magsige'g hilak kay lage dili ikaw ang iyaha? Tae kana dong. Dili ba, Hayahay ang pamati kung mapagawas siya, apan Tae ra gihapon.

Gitagaan ko og puti nga panyo. Ako 'ning gidawat. Ug tan-aw ko, didto nagsugod ang akong istorya. Limpyo kaayo. Putli. Kansang kaputi suwaw kung imong tan-awon. Apan,  Sa dihang kahibalo na ko nga muki-at, Gipahid ko na kini sa buling ug singot. Sa dihang ako nasamdan, Gibagnid ko na kini sa dugo. Sa dihang kahibalo na ko nga muhilak, Gitrapo ko na kini sa luha. Sa dihang kahibalo na ko nga mubati og kasakit, Gibulig ko na kini sa uban. Malipay ko nga magsud-ong, nga gigamit sa akong mga higala ang kining akong panyo. Kung pwede pa lang nga dili ko na kini bawi-on. Bisan kinsa na ang nakapahugaw, ang nakapabasâ, ang nakapagisi sa 'kining panyo. Bun-og. Itom. Hugaw. Bahô. Mao na ang hitsura sa puti nga panyo. ... Aduna ba kaha'y  andam nga muhatag sa ako og  puti nga panyo?

Unsa'y mas pilit sa biko? Unsa'y mas hait sa kutsilyo? Unsa'y mas taas sa hilo? Unsa'y mas gahi sa bato? Bastos, ay. Hugaw. Biga ra. Kung imong isuwat, Mas mo lami pa.

One whole? Ikaw bahala. Bisa'g one-fourth O dili ba kaha, one-eighth. Basta, ang akô lang, Taga-an ko nimo'g papel. Human ko kini madawat, Pwede makahangyo na pud? Mangayo ko'g tabang nimo Kung unsa'y isuwat nako, Para masayod pud ka Kung unsay sulod sa akong papel Nga gikan nimo, ug para nimo. Human, Ako ning ampingan Ang kining papel, Dili pahugaw-hugawan, Dili pakum-utan. Tipigan ko kini pagmaayo. Apan, kung moabot Ang panahon nga mapul-an naka, Sultihi lang ko palihug, Aron sayon ra ang pagsugnod Ko niining papel, Ug sama sa abô nalang ako sa imong kinabuhi; Pwede mo na nga ilabay, kuyog sa hangin.

Kahibalo ka, nagkagusto ko nimo. Mauwaw lang ko musulti kay basin dili na unya ka mutagad nako. Busa, basaha lang kining mga pulong nga imong makita pinaagi sa mga makra inagi-an sa pagduot sa tinta. Akong pagtuo sauna pangtiniguwang na ang gugma. Apan, wala ko damha Nga, hala oy, kagilok - gugma na pud. Ang porma sa imong nawong, muhaom bisag unsang antipara. Ang imong ilong, sus, pwedeng mahay-hayan. Dili pislat, dili ra pud labihang kataas. Ang imong lawas, Pagaksa nalang ko bi. Ang imong pahiyom, Ang imong tingsi, Ang imong katawa, Magkabugto ug ...  Haay. Pwede magbigti? Magbigti pinaagi sa hu-ot mong gakos. Pwede malumos? Malumos sa imong mga halok. Kining tanan-tanan? Maoy ra man. Mauwaw man gyud ko. Unta, imo pud nga nabati Ang nasinati ko nga gugma Pinaagi sa agi sa tinta

Ka-surrenderon nako. Kusog kaayo ang pitik sa kasing-kasing kung makakita ko nimo Magselos ko kung naa kay laing ka istorya. Mangluod ko kung dili ko nimo tagdon or teksan. Maglagot ko kung hangtod karon kay buta-bungol ka gihapon sa akong pagbati kanimo. Ambongan ka. Nasayod ko nga daghan ko'g karibal sa imong pagtagad. Pero mas dako akong bentaha kompara sa uban kay mas dali ko ikaw nga maduolan. Apan, sa katapusan ako ra gihapon ang magsakit kay kining akong pagbati kay ginadili. Antoson ko Dawaton ko Bisag inamigo nalang.

Gikan ko sa Talamban,  padulong dalan Escario sakay sa 13C nga dyip. Ninaog ko sa Ayala, dayon sakay og 12L. Haruhay akong pagsakay, ug sa dihang naa koy nabasahan nga bandal sa usa ka paril 'Kung dili gugma, unsa man?' Nakapangutana pud ko. Unsa kaha? Tumong kaayo sa higayon nga akong gihunahuna kay mahitungod gihapon sa gugma. Gisuwayan nako'g pangutana ang konduktor: Kuya, kung dili gugma, unsa man? Nalisang siya. Nakurat. Wala siya'y tubag sa akong pangutana. Minaog ko sa dyip. Naa ko'y nasugatan nga studyante. Nangutana usab ko niya. Dong, kung dili gugma, unsa man? Napakyas gihapon ko sa akong pagtu-o  nga makakuha nako'g tubag. Kung bu-ot bitaw natong huna-hunaon, unsa pa may  mas labaw sa gugma? Kanang gugma nimo sa usa ka tawo nga wala nimo damha kalit lang mitunga. Permi nimo nga ilimod nga "dili lage gugma." Apan, sakit kaayo ang imong gipamati sa dihang aduna siya'y lain nga makauban, lain nga...

Sayal. Tag-as, lapas sa tuhod. Mao kini si Inday. Layash. Obums na oyaak. Shudi reklamo, hungaw kaayo. Bakya. Tagulkol.Tungkagol. Plak plak lang agi. Bakyang lima ka andanas. Pagka-anyag. Krispi kaayo ang yinatakan. Bahalag natakilpo Gora! Backless. Two-piece. Balahibo sa batiis. Bukton, murag harnis Mao ni uso karon. Mao ni si Dzai. Ang bag-ong Inday.

Mag-uyab o mag-inusara, Unsa ma'y nakalahi sa duha? Ana sila, lingaw ang naay makauban. Naa kay makastorya sa imong mga kasakit, kalipay. Magakos, mahalok, masukmag, masyagitan, mahilakan -  adunay kay malabayan ana tanan. Ana pud sila, nga mas lingaw ang mag-inusara. Wala kay bitbitong laing tawo, makalaag ka nga walay magpugong, Wala kay pananghiran. Sa duha, asa may naay 'forever' ? Sa akong pagsabot lang, noh Kanang ikaw ra usa, Kay  mamatay ra man gihapon 'tang nag inusara. Wala'y mutupad nimo sa lungon. Ikaw ra usa.

Ambot lang ngano. Sakto siguro sila, Nga akong batasan wala'y sama sa lain tawo. Ako ra gyud ni. Grabe nga pagmaoy. Grabe nga pagkaguol. Kanang nangita ka'g paagi Nga mahiuban pud ka balik kanila. Dako ang pagdahum nga malipay pud sila Sama sa imong gibati nga kalipay. Ug diha diha, ako nagduha-duha, Ako pa bang dayunon, O di kaha, maghandum nalang ako kuyog 'ning kasakit. Agay.