Pwerteng Bisaya-a

Naglakaw ko, sa dakong dalan, ngiob ang palibot, dag-om ang panganod, Migakos ang kabugnaw sa tibuok ko nga hubo'ng lawas. Padayon sa paglakaw. Padayon padulong sa wala mahibaw-i nga dangpanan. Anino sa palibot daw nagtutok, nagkatawa, way sama ang ilang kalipay. Daghan sila. Gapundok sila. Wala nako masiguro kung unsa ilang gipangbungat  nga mga pulong. Padayon lang sa paglakaw. Unya, nakita ko. Akong kauban ning panaw. Inusara. Naghilak ko. Iya kong gigakos. Iyang gitrapuhan ning mga luha. Iyang gitabunan akong hubo nga lawas. Lantaw lantaw sa palibot. Pamilyar nga mga porma sa nawong, pero wala man ko'y nadawat nga pagtagad. Gisangpit nako ilang pangalan, walay pagtagad. Nangutana ko ni Inusara, "Nganong ingon ato man sila?" "Nakalimot ba sila nga ako silang higala?" "Nganong mura'g wala'y pakabana sila?" Mibundak ang uwan, kuyog sa pagdagayday sa luha nga ming-ugat sa kinailadman sa kalag...

Sukmag. Lunit. Sagpa. Sakit ni sila  kung imong dawaton. Sigurado nga, bun-og imong aboton. Pero, kahibaw ka unsa ang mas sakit? Pulong. Balikas. Buybuy. Libak. Dili ni sila pisikal. Dili ni sila makalabhag. Dili ni sila makabukol. Pero, hinaya lang og salo. Kung ikaw ma-igo, sigurado nga mahilom ka, makaginhawa ka'g halalom, makaluha ka. Ang mas nakasakit pa ana, kung imo kining nadawat sa usa nimo ka higala, kay mura kini'g tango nga mingduut sa unod.

#LanniePH #MaringPH Bundak uwan Ipaanod akong hunahuna Kuyog sa nagdagayday nga mga luha Bundak uwan Ipahungaw akong pagbati Kuyog sa nagtagotago nga pagsinati Bundak uwan

Ngitngit ang palibot. Nagkuyog ta,  apan dili tika makab-ot. Gitutokan tika. Tuod, wala nako maklaro kung ikaw nagmata. Nalingaw kong naminaw, sa imong hagok, Pagkasi-aw gyud. Ikaw gyud na, dili laing tawo. Unya sa. Nganong maguol man ko? Sa pagkatinuod ikaw man akong kuyog. Dili ba dapat, kalipay akong bati-on? Nganong maguol man ko? Sa karong higayon ikaw man naa sa akong atubangan. Kahibalo ka, napundok na unta akong kusog nga mosulti nimo sa kining pagbati. Pero mura og nawala man. Mura kog gibira palayo sa imuha. Layo na ang distansya. Layo Na. Dili nako. Makawala og gana, kay layo na ka. Distansiya na lang.

Julies is a bakeshop Nakapalit ko'g pan sa Julies. Permi nakong paliton, ensaymada. Lami siya. Tam-is. Naay pasas. Taga-uli nako, sa kadtong yagit pa ko, ensaymada gyud akong gustong paliton. Unahon gyud nako'g kaon ang pan, ulahi ang pasas. Apan, nagkadugay, nagkapuol man -- una, ang ensaymada, sunod ang pasas. Akong gisugdan ang pagbuhi, pagbiya sa ensaymada. Wala nako mopalit. Pero, taga labay nako sa atubangan sa Julies, mura ma'g manitsit, mangsenyas ang ensaymada, hasta ang pasas.

Hala! Ang langgam. Gustong mogawas. Huyang na ang hawla. Hala! Ang langgam. Hapit na mogawas. Ayaw usa, kay dili pa mao ang takna. Hala!

A poem for my two friends who will be working in Vietnam for longer months. Take care Dave and Woogue. (suma - Summa Cum Laude;  antepara - Eye glasses)

Hi oy. Imong nawong man ang nisugat, sa pagsaka nako sa dyip. Hi oy. Timing gyud nga, bakante ang dapit sa imong kilid. Pwede mo tapad? Haaaay, nakalingkod na gyud ko, tapad nimo. Hawan bitaw ang lingkuranan. Pero, wala ka mahibong nga nisikit gyud ko nimo? Nagbangga-ay atong tuhod. Wala ra pud ka molikay. Bangga pud ka. Mao na ba na ang sinyas nga ganahan sad ka nako? Kapaspas sad oy. Hinay hinay lang. Ayaw unhi ang dagan sa dyip. Nisibog ka, sibog sad ko. Sikit lage 'ta ba. Ikaw gyud. Lingi sad diri. Dugay ra kong nagtutok sa imong nawong. Lingi ba. 'Para lang' Munaog nako. Dili ko nimo ubanan? Bitaw oy. Ayo-ayo ha. Sa sunod na pud natong  pagtapad.

Hi, oy. Unsa imong pangalan? Dugay nakong nakabantay nimo, sa bintana sa imong kwarto. Naa ka sa taas. Naa ko sa ubos. Dili parehas atong dakbalay. Unsa kaha'y hitsura nimo, noh? Tan-aw ko, ambongan ka. Sa porma pa lang,  nakasiguro ko nga lahi ka sa uban. Hi, oy. Imo sad baha kong namatikdan, diri sa akong bintana? Basin, sa panon sa mga tawo, magkasugat atong dalan. Hi, oy. Unta imo kining mabasa,  aron masayod ka, nga kini para sa tawo nga naa sa bintana.

Nakahunahuna mi'g kaon og balot. Itlog. Itik. Luod. Lami. Ug diha nako masabtan, nga akong kinabuhi, Balot. Naay ganahan; naa puy dili kauyon. Naay lami-an; naa puy lud-an.

Imong mga mata kusog kaayo manutok daw nanghagad nga tutokan pud tika;  sa dugay natong walay pamilok unta imong makita akong pagbati Imong ilong bulahan ka taas gyud siya pwedeng makapyotan; sa dungan natong pagginhawa unta imong mahingos akong kamingaw Imong ba-ba puno sa pahiyom daw imong gipana sa nagmug-ot kong baba; sa nagkaduol ang duha unta ikaw motilaw sa akong kahidlaw

Gimingaw ko nimo. Akong paghunahuna, dili na matungkad. Ako mang gipugos akong kaugalingon nga dili tika hunahunaon; Apan sa damgo ko, ikaw naglaroy-laroy. Nagdamgo pud baha ka nako? Ganahan pud baha ka kung naa ko? Gimingaw gyud bitaw ko nimo.

Kaila man 'ta sauna Sa wala pa nimo makit-e siya Kaila pa man siguro 'ta Kung ikaw naay kinahanglan sa ako-a Gimingaw ko nimo sauna Makigkita dayon, usa ka text ra. Mas gimingaw man siguro ko nimo karon Pero lahi naman ko sa imong panan-awon Dawat ko ra man Kung unsa ko sa imoha Dawat ko ra man Nga nakakita naka'g imoha Dawat ko ra man Nga wala nato sauna Apan hangyo ko lang Atong pagkaamigo,  ... hahay! Mura'g nawala naman. Oras ug pagtagad Ihatag ko isip halad Dili ko sayangan Ang mga panahon nga imo kong gikuyogan Pero, hain ka naman? Imo man kong gibiyaan.