Liso, Abli, Agas

Ringgg!...
Siyagit sa relo nga mi alarma, alas singko sa kabuntagon.

Bangon.
Kuha sa tsinelas.
Hinay-hinayng gibitad ang mahuyang nga kalag paingon sa banyo.

Liso.
Dinhi magsugod ang kombate -
Sa init nga lawas kontra sa bugnaw nga tubig.
Usahay, magduha-duha ka pa
nga kanus-a nimo lisoon ang gripo.

Apan, kanus-a pa man nimo sugdan?
Anha na ba kang mukihol kung maunhan naka?
Dili ra ba sa imuha permi ang higayon;
Ug tingali'g maunhan ka pa sa uban.
Kung galing maunhan, ikaw na pud unya'y magpa-abot.

Lahi na nga gripo ang imong mabati,kompara sa wala pa kini mahilabti.

Abli.
Ninganga ang baba sa gripo.
Wala ta masayod kung unsa ang itagak,
kung unsa nga matang sa likido ang mugawas.
Ug labaw sa tanan,
wala ta masayod  kung aduna ba kini itakag.

Kung wala man gani, mao nay giingon nga pagkamalas naman lang gyud.

Agas.
Midagayday ang bugwak sa tubig.
Milatay sa tubo paingon sa baba sa gripo.
Mitagak.
Mitunob.
Mibubo ang tubig sa kalawasan.
Nakapa-igking sa mahuyang nga kalag.
Naghatag og kabaskog ug igong kusog.

Ayaw pag usik-usik. Pamahin sa uban. Hinunoa, ang butang adunay kahutdanan.