Gugmang Dili Makab-ot

Tutok.
Tutoki gyud.
Gitutokan pa gyud.

Hangtod ingon ani nalang ba permi?

Dili ikalimod day,
Pagkagwapa sa imong panagway.
Haskang pagkahamugaway.
Nilaktan mo, pinakiaykiay,
Sinulti-an mo, pagkahan-ay.
Wala nako'y laing gipangita day.
Magtulo gani akong laway -- usahay.

Nakadungog na ba ka sa kanta sa Mantequilla nga Ibog-ibog?

"Kung kahibaw lang ka nga ikaw ang babaye sa akong damgo. 

Kung kahibaw lang ka nga unsa ko kalipay kung makita tika. 

Kung ako magul-anon ikaw dayon ang pangitaon"

Kagilok paminawon sa kanta.
Makatingsi man tag walay hinungdan.
Mura man ko'g gigitik sa makaduha.

LRJ ka day.
Dili pasabot nga "Lahi Ra Jud",
kung dili "Layo Ra Jud" ka sa akong tungod.
Mahadlok ko nga moduol nimo.
Mahadlok ko musagol sa inyong panon.

Adunay higayon nga nagkasugat ta,
Hapit 'tang magbangga,
Hapit magdikit atong mga baba.
Nabati nako ang gininhawaan sa imong ilong.
Apan, pastilan.
Kanus-a pa kaha ni mahitabo?
Pangandoy lang usa ang atoa ani.

DMD.
Dili Madala Day.
Dili na gyud madala akong pagbati kanimo.
Lisod man pud diay ning mahigugma,
Kalit kalit lang nga maguol,
Kalit kalit lang mutukar ang kamaoy,
Nga murag motulisok sa kaunoran sa imong kasingkasing.

Wala pud ko kahibalo kung sala pud ba ning mahigugma.
Layo pa gani ang Semana Santa,
Kalbaryo naman akong nabati.
Mahadlok man gyud 'ning pamati, day.
Mahadlok ko nga imo kung isalikway.
Mahadlok ko nga dili ko nimo dawaton.
Mahadlok ko nga maparehas ang akong masinati
sa balak ni Cindy Velasquez.

"Nangutana ka, ikapila mamatay ang buwak. 

Nitubag ko, Ay kausa ra undo. 

Miingon ka, Dili. 

Kaduha mamatay ang buwak.  

Una, inig kuha nimo ana sa sanga. 

Kaduha, inig hatag nimo sa tawo nga imong gihigugma ug miingon siya --  

Dili ko na dawaton"

Basin, dili pa karon ang saktong panahon
Para akong ipabuhagay ang akong gidaladalang pagbati.
Ako malaumon day,
Nga unta aduna pud unta 'kay ginatawag nila nga
Gugma
Sa ako inday.